Депутат выразил соболезнование в связи с кончиной известного якутского ученого

САХА УУС УДЬУОРУН КҮӨТТЭЭЧЧИ

Ксенофонт Дмитриевич Уткин - Нүһүлгэн Күн Сириттэн арахпыт диэтилэр...

Саха омуга, Саха Сирэ, Бүтүн Россия ыар сүтүктэммит...

Ксенофонт Дмитриевич дэгиттэр талааннаах Уус Киһи быһыытынан бу Орто Туруу Бараан Дойдуга элбэҕи онорон, суруйан, айан-тутан хааллардаҕа дии.

Ол эрэн, мин санаабар, кини бэйэтин омугар САХА УУС УДЬУОРА буоларын КҮӨТТЭЭЧЧИ быһыытынан суол-иис хайбыта уһулуччу суолталаах уонна кэлэр кэнэҕэски кэмнэргэ кэнчээри ыччаттарбыт туһугар, саха омук быстыбатын-ойдубатын туһугар чочуйан хаалларбыт сүдү мэҥэ тааһа буолар.

Кини наука эйгэтигэр сахалар тимири уһаарар сатабылларын туһунан диссертация суруйан чинчийээччи быһыытынан аата-суола саҕаламмыта. Сахалар түҥ былыргыттан тимири уһааран, суохтан баары оҥорон тыйыс айылҕалаах Уһук Хоту Дойдуга Олоҕу туругурдубуттарын дакаастаабыта.

Ксенофонт Дмитриевич философия, культура, поэзия, онтон да атын эйгэлэргэ айан-тутан, оҥорон хаалларбыта сүрдээх элбэх. Ону кэнэҕэскитин үөрэтиэхтэрэ, үйэтитиэхтэрэ.

Мин кинилиин алтыһан, "саха туһа" диэн санаанан салайтаран аҕыйах барылга бииргэ үлэлэспиппиттэн сүрдээҕин астынабын. Ксенофонт Дмитриевич киһи быһыытынан сүрдээх сэмэй, үөрүнньэн буолара. Үлэһит, суруксут быһыытынан киһини эрэ сөхтөрөр кыахтардааҕа, дьулуурдааҕа.

Быдан дьылларга бырастыы күндү киһибит, ытыктабыллаах Ксенофонт Дмитриевич.

Российскай Федерация Государственнай Думатын депутата Федот Тумусов.

Текст на якутском языке.